AFMADOW (Jubaland Tv) – Ciidanka Booliska degmada Afmadow ee gobolka Jubbada Hoose ayaa howlgal qorsheysan ku soo qabtay rag ku howlanaa laynta iyo ka ganacsiga sharci darrada ah ee ugaarta, kuwaas oo khatar weyn ku hayay duur-joogta deegaanka.
Faahfaahinta Howlgalka
Raggan la soo qabtay ayaa la sheegay inay horey isaga dheago-tireen digniino is daba joog ah oo looga mamnuucayay xaalufinta kheyraadka dabiiciga ah. Falkan ayaa loo arkaa mid meel ka dhac ku ah deegaanka, xilli ay horay u jireen awaamiir cad oo lagu mamnuucay ugaarsiga sharci darrada ah.
Hadalka Guddoomiyaha Degmada
Guddoomiyaha degmada Afmadow ahna Duqa Magaalada, Mudane Cabdiraxmaan Macallin Cali (Xaaji-Maaji), oo faahfaahin ka bixiyay ammuurtan ayaa yiri:
“Raggan waxaa lagu soo qabtay howlgal qorsheysan oo ay fuliyeen ciidanka ammaanka. Waxaan u gudbinaynaa hay’adaha cadaaladda si degdeg ahna loo horgeyn doonaa maxkamadda si sharciga loo waafajiyo.”
Baaq ku Socda Bulshada
Guddoomiye Xaaji-Maaji ayaa farriin adag u diray dadka ku dhaqan degmada iyo agagaarkeeda:
- Ilaalinta Deegaanka: In laga fogaado xaalufinta kheyraadka dabiiciga ah iyo laynta duur-joogta.
- Wada-shaqayn: In shacabku ay la shaqeeyaan hay’adaha ammaanka si loo soo qabto kuwa u taagan dhibaataynta deegaanka.
- Wacyigelinta: In loo midoobo ilaalinta bilicda iyo hantida dabiiciga ah ee dalka.
Maamulka degmada Afmadow ayaa ballan-qaaday inay sii wadayaan dadaallada lagu ilaalinayo duur-joogta, iyadoo gacan bir ah lagu qaban doono cid kasta oo ku xad-gudubta shuruucda deegaanka.
W/ Q Abdikadir Jama Mohamed
Kala Soco wararka dheeradka ah ee Degmada Afmadow
About The Author
