Afmadow – In ka badan 450 qoys oo ka soo barakacay degmada Xagar ee gobolka Jubbada Hoose ayaa goor dhow soo gaaray degmada Afmadow, iyadoo ay si isa soo taraysa u kordhayaan barakacayaasha ku qulqulaya kaamamka ku yaalla waqooyiga magaalada.
Qoysaskan oo u badan haween, carruur iyo dad da’ ah ayaa wajahaya xaalad nololeed oo aad u adag. Waxaa ka muuqata daal, harraad iyo diif ba’an, taas oo ay sii dheer tahay cunno la’aan iyo hoy la’aan.
Barakacayaasha ayaa sheegay in ay ka soo carareen deegaanadoodii sababo la xiriira abaaro daba-dheeraaday oo saameyn weyn ku yeeshay nolol-maalmeedkooda. Roob la’aanta jirta ayaa sababtay in ay waayaan biyo, cunto iyo daaq ay ku tiirsanaayeen.
Sidoo kale, qaar kamid ah qoysaska ayaa tilmaamay in xoolihii ay dhaqaale ahaan ku tiirsanaayeen ay u dhinteen abaarta awgeed, halka kuwo kalena ay ku qasbanaadeen inay iibiyaan si ay u helaan nolol maalmeedkooda.
Kaamamka ay barakacayaashu ku sugan yihiin ayaa wajahaya ciriiro iyo adeegyo yari, waxaana jirta baahi degdeg ah oo loo qabo gargaar bani’aadannimo, gaar ahaan biyo nadiif ah, raashin iyo hoy ku-meel-gaar ah.
Ugu dambeyn, qoysaskan danyarta ah ayaa ugu baaqay dowladda, hay’adaha samafalka iyo bulshada Soomaaliyeed in ay la soo gaaraan gargaar degdeg ah, si loo badbaadiyo nolosha dadka ay abaartu sida ba’an u saameysay.
W/Q Abdikadir Jama Moahamed
About the Author
