Kismaayo – Wasiirka Wasaaradda Haweenka, Arrimaha Qoyska iyo Xuquuqul Insaanka ee Dowladda Jubbaland, Marwo Cadar Ismaaciil Juraati, ayaa maanta si rasmi ah uga daah-furtay xarun cusub oo loogu talagalay haweenka, taasoo ku taalla deegaanka Istanbuul ee waqooyiga magaalada Kismaayo.
Xaruntan cusub ayaa loo dhisay in ay kor u qaaddo awoodda haweenka, isla markaana ay siiso fursado waxbarasho iyo tababaro ku saabsan xirfadaha gacanta iyo ganacsiga yar-yar. Ujeeddada xarunta ayaa ah in haweenku helaan aqoon iyo xirfado u suurtagelinaya is-ku-filnaansho dhaqaale iyo ka qeybqaadasho firfircoon oo horumarinta bulshada ah.
Marwo Cadar Ismaaciil Juraati oo ka hadleysay munaasabadda furitaanka ayaa sheegtay in Wasaaradda Haweenku ay mudnaan gaar ah siinayso horumarinta haweenka, gaar ahaan kuwa ku nool deegaanada baahiyaha gaarka ah leh. Waxay xustay in haweenku ay yihiin laf-dhabarta qoyska iyo bulshada, isla markaana loo baahan yahay in la siiyo fursado ay kaga qeybqaataan kobaca dhaqaalaha iyo dhismaha mustaqbalka Jubbaland.
Wasiiraddu waxay sidoo kale uga mahadcelisay hay’adda CARE, oo ah hay’ad caalami ah oo ka shaqeysa arrimaha bulshada iyo horumarinta haweenka, taasoo dhistay xaruntan cusub. Waxay tilmaantay in iskaashiga ka dhexeeya Dowladda Jubbaland iyo hay’adaha samafalka uu door muhiim ah ka qaato horumarinta adeegyada bulshada, gaar ahaan kuwa haweenka iyo carruurta.
Dhankooda, qaar ka mid ah haweenka ka faa’iideysan doona xarunta ayaa muujiyey farxad iyo rajo, iyagoo sheegay in xaruntan ay ka caawin doonto inay bartaan xirfado ay ku abuuran karaan nolol-maalmeedkooda, isla markaana ay ka baxaan ku-tiirsanaanta dhaqaale.
Xaruntan ayaa la filayaa in ay noqoto goob tababar iyo dhiirrigelin u ah haweenka deegaanka Istanbuul, isla markaana ay gacan ka geysato yareynta saboolnimada, shaqo la’aanta, iyo caqabadaha horyaalla haweenka ku nool magaalada Kismaayo iyo nawaaxigeeda.
About the Author
