Marwada Madaxweynaha Dowladda Koonfur Galbeed Soomaaliya, Marwo Zamzam Mahad Cabdirahmaan, ayaa maanta booqasho ku tagtay Xarunta Agoonta ee Magaalada Baydhabo, halkaas oo ay gaarsiisay deeq raashiin ah oo loogu talagalay carruurta ku nool xaruntaasi, taasoo muujinaysa garab-istaag iyo taageero ay u muujinayso agoonta.
Intii ay booqashada ku guda jirtay, Marwo Zamzam ayaa kulan la yeelatay maamulka xarunta iyo carruurta, iyadoo si dhow uga xog-wareysatay xaaladda nololeed, waxbarasho iyo baahiyaha aas-aasiga ah ee ay wajahayaan carruurta agoonta ah. Waxay carruurta ku boorrisay samir, dadaal iyo ku adkaysiga waxbarashada, iyadoo u muujisay rajo iyo yididiilo ku aaddan mustaqbalkooda.
Marwada Madaxweynaha ayaa sidoo kale ballan-qaadday in ay sii wadi doonto dadaallada lagu taageerayo agoonta, iyada oo ka shaqeyn doonta in la xoojiyo adeegyada daryeelka iyo fursadaha waxbarasho ee ay helayaan carruurta nugul.
Dhankooda, maamulka Xarunta Agoonta ee Baydhabo ayaa si weyn uga mahadceliyay Marwada Madaxweynaha deeqda raashiinka ah iyo booqashada ay ku timid xarunta, iyagoo xusay in taageeradaasi ay wax weyn ka tari doonto nolol-maalmeedka carruurta ku jira xarunta.
Ugu dambeyn, Marwo Zamzam Mahad Cabdirahmaan ayaa adkaysay muhiimadda ay leedahay iskaashi iyo wada-jir u dhexeeya dowladda, hay’adaha samafalka iyo bulshada, si loo xaqiijiyo in agoonta iyo carruurta nugul ee ku nool deegaannada Koonfur Galbeed ay helaan daryeel dhammeystiran iyo mustaqbal ka wanaagsan.
About the Author
