Waxaa dib loo dhigay laba (2) maalmood qabashada Madasha Aragti Wadaag ee Machadka Heritage, kaas oo sanadkan lagu qabanayo Caasimadda Galmudug ee Dhuusamarreeb.
Wasiirka Arrimaha Gudaha iyo Dib u Heshiisiinta Dowladda Galmudug, ahna Guddoomiyaha Guddiga Qabanqaabada Shirka Mudane Cabdi Maxamed Jaamac, iyo Agaasimaha Machadka Heritage Mudane Mursal Saney, ayaa si wadajir ah uga warbixiyay sababaha keenay dib u dhaca ku yimid qabsoomidda shirka.
Mas’uuliyiinta ayaa sheegay in dib u dhigistan ay timid kaddib qiimeyn lagu sameeyay arrimo farsamo iyo diyaar-garow oo la xiriira habsami u socodka madasha, si loo xaqiijiyo in shirka uu u qabsoomo si hufan, ammaan ah, isla markaana ka tarjuma himilooyinka laga leeyahay.
Waxay sidoo kale xuseen in Madasha Aragti Wadaag ay tahay munaasabad qaran oo muhiim ah, laguna lafa-guro arrimo quseeya siyaasadda, nabadda, amniga, horumarinta iyo dowlad-dhiska Soomaaliya, taasoo u baahan diyaargarow buuxa iyo ka qeybgal ballaaran.
Mas’uuliyiintu waxay u xaqiijiyeen ka qeybgalayaasha iyo daneeyayaasha madasha in taariikhda cusub ee shirka si rasmi ah loo shaacin doono, isla markaana ay ka go’an tahay in madashu u qabsoonto si guul leh oo miro-dhal ah.
Ugu dambeyn, waxay uga mahadceliyeen dhammaan marti-sharafta, ka qeybgalayaasha iyo bulshada guud ahaan dulqaadka iyo fahamka ay muujiyeen, iyagoo ku boorriyay in ay sii wataan wada-shaqeynta iyo taageerada madasha.
