Madaxweynaha Dowladda Jubaland, Mudane Axmed Maxamed Islaam, ayaa maanta si rasmi ah u saxiixay saddex (3) xeer oo muhiim ah, kuwaas oo horey ay u soo ansixiyeen Golaha Wasiirrada iyo Golaha Baarlamaanka Dowladda Jubaland.
Xeerarkan la saxiixay ayaa la xiriira arrimo muhiim u ah maamulka dhulka, badqabka waddooyinka iyo tayeynta adeegyada caafimaadka, waxaana lagu tilmaamay kuwo door weyn ka qaadan doona horumarinta nidaamka dowladnimo ee Jubaland.
Xeerarka uu Madaxweynaha saxiixay ayaa kala ah:
- Xeerka Wax-ka-beddelka iyo Kaabista Xeerka Maareynta Dhulka ee Magaalooyinka, kaas oo ay soo gudbisay Wasaaradda Howlaha Guud, Guriyeynta iyo Dib-u-dhiska, laguna hagayo habraaca sharciyeynta, qorsheynta iyo maareynta dhulka magaalooyinka Jubaland.
- Xeerka Nabad-galyada Guud ee Wadooyinka Dowladda Jubaland, oo ay soo diyaarisay Wasaaradda Gaadiidka iyo Duulista Hawada, kaas oo diiradda saaraya badqabka waddooyinka, nidaaminta gaadiidka iyo yareynta shilalka.
- Xeerka Xirfadlayaasha Caafimaadka Dowladda Jubaland, oo ay soo gudbisay Wasaaradda Caafimaadka iyo Daryeelka Bulshada, kaas oo lagu nidaaminayo shaqada, tayada iyo masuuliyadda xirfadlayaasha caafimaadka si loo helo adeeg caafimaad oo hufan.
Saxiixa xeerarkan ayaa ka tarjumaya ka go’naanshaha Dowladda Jubaland ee horumarinta adeegyada bulshada, ilaalinta badqabka muwaadiniinta iyo dhismaha hay’ado sharciyeysan oo waxtar leh.
About the Author
