CABDALLA BIROOLE — Wasiir ku-xigeenkii hore ee Wasaaradda Qoyska iyo Horumarinta Xuquuqul Insaanka ee Dawladda Federaalka Soomaaliya, Marwo Xanaan Cabdicasiis Bare, ayaa maanta deeq raashin ah oo isugu jirta qeybaha kala duwan ee quutul-daruuriga gaarsiisay qoysaska tabaaleysan ee ku dhaqan deegaanka Cabdalla Biroole ee gobolka Jubbada Hoose.
Garab-istaag Joogto ah iyo Gurmad Degdeg ah
Tallaabadan bini’aadannimo ayaa qayb ka ah dadaallo xiriir ah oo ay Marwo Xanaan ugu jirto u kuur-galka iyo wax ka qabashada xaaladaha adag ee ay wajahayaan dadka ay saameeyeen abaaraha daba-dheeraaday. Qaybinta raashinkan ayaa timid maalmo yar uun ka dib markii ay Marwadu deegaankaas ka fulisay mashruuc weyn oo biyo-dhaamin ah, kaas oo wax weyn ka qabtay baahidii ba’nayd ee dhanka biyaha ee ka jirtay Cabdalla Biroole iyo nawaaxigeeda.
Saameynta Abaarta iyo Caawinta Xoolo-dhaqatada
Qoysaska ka faa’iideystay gargaarkan ayaa u badan dad xoolo-dhaqato ah oo ay si ba’an u taabatay abaartu, ka dib markii ay waayeen daaqii iyo biyihii ay ku tiirsanaayeen xoolahoodu. Maaddaama nolosha dadka deegaanku ay ku xiran tahay wax soo saarka xoolaha, abaarta jirtay waxay keentay nugulnaan xad-dhaaf ah oo dhanka nolosha ah.
Marwo Xanaan Cabdicasiis oo ka hadashay goobta ayaa sheegtay:
“Maanta waxaan halkaan u nimid inaan walaalaheenna reer Cabdalla Biroole la qaybsanno dhibaatada iyo baahida ka dhalatay abaarta. Ma ahan markii ugu horreysay, kumana ekaan doonto markii ugu dambeysay, waayo waa waajib ina saaran inaan garab istaagno bulshada nugul xilliyada adag.”
Mahadcelinta Dadka Deegaanka
Bulshada ku dhaqan Cabdalla Biroole iyo odayaasha deegaanka ayaa si diiran usoo dhoweeyay deeqdan, iyagoo xusay in Marwo Xanaan ay tahay mas’uul mar kasta dareenta dhibaatada dadkeeda. Waxay tilmaameen in gargaarkan raashinka ah iyo kii biyo-dhaaminta ee ka horreeyayba ay ku soo aadeen xilli ay dadku ku jireen xaalad quus ah.
Dadaalladan ayaa muujinaya muhiimadda ay leedahay in madaxda iyo haldoorka bulshadu ay door firfircoon ka qaataan u adeegidda dadka danyarta ah, gaar ahaan xilliyada ay jiraan musiibooyinka dabiiciga ah sida abaaraha.
About The Author
