DHUUSAMARREEB, Galmudug – Madaxweynaha Dowladda Galmudug, Mudane Axmed Cabdi Kaariye (Qoorqoor), ayaa maanta magaalada Dhuusamarreeb ku guddoomiyay shirka todobaadlaha ah ee Golaha Wasiirrada Dowladda Galmudug. Shirkan oo ahaa mid muhiim ah, waxaa goob-joog ka ahaa Madaxweyne ku-xigeenka Dowladda Galmudug, Mudane Cali Daahir Ciid.
Kulankan ayaa diiradda lagu saaray labada arrimood ee ugu horreeya hortabinta dowladda, kuwaas oo kala ah: Xaqiijinta amniga guud iyo ka jawaabista xaaladda bini’aadanimo ee ka dhalatay abaaraha ku dhuftay deegaannada Galmudug.
Warbixinta Amniga iyo Horumarka Hawlgallada
Ugu horreyn, xubnaha Golaha Wasiirrada ayaa warbixin dhinacyo badan taabanaysa ka dhageystay Wasiirka Wasaaradda Amniga Gudaha. Wasiirka ayaa soo bandhigay xaaladda guud ee nabadgelyada deegaannada Galmudug iyo guulaha laga gaaray hawlgallada socda ee lagu xaqiijinayo amniga magaalooyinka waaweyn iyo jid-gooyooyinka.
Madaxweyne Axmed Cabdi Kaariye ayaa ku bogaadiyay laamaha amniga dadaalkooda hagar la’aanta ah, wuxuuna faray in la kordhiyo feejignaanta si loo sugo nabadgelyada shacabka, gaar ahaan xilliyada lagu jiro diyaar-garowga munaasabadaha iyo isbeddellada socda.
Gurmadka Abaaraha iyo Maareynta Musiibooyinka
Dhanka kale, Goluhu wuxuu si qoto dheer uga dooday xaaladda abaaraha ka jira deegaannada Galmudug iyo saameynta ay ku yeesheen dadka iyo duunyada. Wasiirka Wasaaradda Gargaarka iyo Maareynta Musiibooyinka ayaa golaha horkeenay warbixin dhammeystiran oo ku saabsan baahiyaha jira iyo abaabulka loogu jiro gurmad loo fidinayo dadka tabaalaysan.
Golaha Wasiirrada ayaa isku raacay in loo baahan yahay isku-duubni heer dowlad iyo heer bulsho ah si looga hortago cawaaqibka abaarta. Madaxweynaha ayaa ku baaqay in la dardar-geliyo xiriirka hay’adaha gargaarka si kaalmada loogu qaybiyo si caddaalad ah oo degdeg ah meelaha ugu daran.
Gunaanad
Shirka ayaa kusoo dhammaaday jawi is-afgarad ah, iyadoo Madaxweynuhu uu kula dardaarmay wasiirrada inay si hufan u gutaan waajibaadka loo igmaday, si loogu adeego shacabka Galmudug loona gaaro xasilooni waarta iyo horumar dhaqaale.
About The Author
