KISMAAYO (Jubaland TV) – Madaxweynaha Dowladda Jubaland, Mudane Axmed Maxamed Islaam, ayaa maanta kulan dhiirrigelin iyo qaddarin ah la qaatay Saraakiisha hawlgallada gaarka ah ee Taliska Maraykanka ee Afrika (AFRICOM), kuwaas oo ka hawlgala deegaannada Jubaland.
Iskaashiga Amniga iyo Dagaalka ka dhanka ah Khawaariijta
Kulankan ayaa diiradda lagu saaray horumarka laga gaaray dhinaca amniga iyo iskaashiga istiraatiijiga ah ee u dhexeeya Ciidanka Jubaland iyo saaxiibbada caalamiga ah. Madaxweynaha ayaa saraakiisha uga mahadceliyey doorkooda firfircoon ee ku aaddan:
- Tababarka Ciidanka: Kobcinta xirfadda iyo aqoonta ciidamada gaarka ah ee Jubaland.
- Hawlgallada Wadajirka ah: Taageerada dhinaca hawada iyo dhulka ee hawlgalladii ugu dambeeyay ee lagu jebiyey kooxaha Khawaariijta ah deegaanno kala duwan oo ka tirsan Jubaland.
Bilad Sharaf iyo Shahaado Sharaf
Madaxweyne Axmed Maxamed Islaam ayaa ku ammaanay Saraakiisha AFRICOM geesinimada, dhabar-adayga iyo wada-shaqaynta dhow ee ay la leeyihiin laamaha amniga Jubaland.
Si loo muujiyo qaddarinta ay dowladda iyo shacabka Jubaland u hayaan naftii-huridda iyo taageerada Maraykanka, Madaxweynaha ayaa saraakiisha si rasmi ah u guddoonsiiyey:
- Bilad Sharaf: Looga aqoonsanayo kaalintii ay ka qaateen xoraynta deegaannada.
- Shahaado Mahadcelin: Oo lagu sharfayo mudadii ay u adkaysteen duruufaha adag ee hawlgallada.
Ugu dambayn, Madaxweynaha ayaa xaqiijiyey in Dowladda Jubaland ay ka go’an tahay sii socoshada iskaashigan muhiimka ah, ilaa laga xaqiijinayo nabadgelyada guud ee deegaanka iyo ciribtirka argagixisada.
W/Q Abdikadir Jama
About the Author
