Dhuusamarreeb: Madaxweynaha Dowladda Galmudug Mudane Axmed Cabdi Kaariye (Qoor Qoor) ayaa maanta magaalada Dhuusamarreeb si diirran ugu soo dhaweeyay Danjire Maxamed Ibraahim Yuusuf, Safiirka Jamhuuriyadda Jabuuti u fadhiya Soomaaliya, iyo wafdi uu hoggaaminayo.
Wafdiga Safiirka ayaa yimid caasimadda Galmudug si ay uga qayb galaan Shirka Madasha Aragti-Wadaagga, oo uu soo qabanqaabiyay Machadka Heritage, islamarkaana caawa si rasmi ah uga furmay magaalada Dhuusamarreeb.
Soo dhaweynta wafdiga Safiirka Jabuuti ayaa ka dhacday xarunta madaxtooyada Galmudug, waxaana goob joog ka ahaa mas’uuliyiin sare oo ka tirsan Dowladda Galmudug, xubno ka mid ah golaha wasiirrada, saraakiil amni, iyo marti sharaf kale. Tani waxay muujinaysaa xiriirka soo jireenka ah iyo iskaashiga dhow ee u dhexeeya Jamhuuriyadda Jabuuti iyo dowlad-goboleedyada Soomaaliya.
Madaxweynaha Galmudug Mudane Axmed Cabdi Kaariye ayaa bogaadiyay ka qaybgalka Safiirka Jabuuti ee shirka, isagoo xusay in Madasha Aragti-Wadaaggu ay tahay fursad muhiim ah oo lagu xoojinayo wada-hadalka, is-dhaafsiga aragtiyada, iyo iskaashiga ku aaddan arrimaha siyaasadda, amniga, iyo horumarka dalka.
Dhankiisa, Danjire Maxamed Ibraahim Yuusuf ayaa uga mahadceliyay Dowladda Galmudug iyo shacabka Dhuusamarreeb soo dhaweynta wanaagsan ee loo sameeyay, wuxuuna carrabka ku adkeeyay doorka Jamhuuriyadda Jabuuti ee taageerada nabadda, dowlad-dhiska, iyo horumarka Soomaaliya.
Shirka Madasha Aragti-Wadaagga ee Machadka Heritage ayaa diiradda saaraya arrimo muhiim ah oo ay ka mid yihiin dowlad-dhiska, nidaamka federaalka, xasilloonida siyaasadeed, iyo xoojinta wadashaqeynta u dhexeysa hay’adaha kala duwan ee dalka.
W/Q Abdikadir Jama Mohamed
About The Author
