Dhuusamarreeb: Madaxweynaha Dowladda Galmudug Mudane Axmed Cabdi Kaariye (Qoor Qoor) ayaa maanta garoonka diyaaradaha Ugaas Nuur ee magaalada Dhuusamarreeb si rasmi ah ugu soo dhaweeyay Madaxweynaha Dowladda Waqooyi Bari Mudane Cabdikhadir Axmed Aw-Cali (Firdhiye) iyo wafdi uu hoggaaminayo.
Wafdigan ayaa yimid magaalada Dhuusamarreeb si ay uga qayb galaan Shirka Madasha Aragti-Wadaagga, kaas oo uu soo qabanqaabiyay Machadka Heritage, islamarkaana la filayo inuu si rasmi ah uga furmo caasimadda Galmudug.
Soo dhaweynta wafdiga Madaxweynaha Waqooyi Bari ayaa waxaa ka qayb qaatay mas’uuliyiin sare oo ka tirsan Dowladda Galmudug, xubno ka mid ah golaha wasiirrada, maamulka gobolka Galgaduud, saraakiil ka tirsan laamaha amniga, iyo qeybaha kala duwan ee bulshada. Tani waxay muujinaysaa muhiimadda uu shirku u leeyahay wada-tashiga siyaasadeed iyo iskaashiga dowlad-goboleedyada.
Shirka Madasha Aragti-Wadaagga ee Machadka Heritage ayaa ah madal lagu gorfeeyo arrimaha la xiriira dowlad-dhiska, xasilloonida siyaasadeed, amniga, horumarinta nidaamka federaalka, iyo sidii loo xoojin lahaa wada-shaqeynta u dhexeysa dowlad-goboleedyada dalka.
Madaxweynaha Dowladda Galmudug Mudane Axmed Cabdi Kaariye ayaa sheegay in Galmudug ay mar walba diyaar u tahay martigelinta shirarka qaran ee lagu xoojinayo midnimada iyo wadajirka shacabka Soomaaliyeed. Wuxuu xusay in Dhuusamarreeb ay door muhiim ah ka qaadanayso kulamada wadatashiga iyo horumarinta nabadda.
Dhankiisa, Madaxweynaha Dowladda Waqooyi Bari Mudane Cabdikhadir Axmed Aw-Cali (Firdhiye) ayaa uga mahadceliyay Dowladda Galmudug iyo shacabka Dhuusamarreeb soo dhaweynta diirran ee loo sameeyay wafdigiisa. Wuxuu sheegay in shirkan uu fursad u yahay is-weydaarsiga aragtiyo wax ku ool ah oo ku saabsan horumarka iyo xoojinta wada-shaqeynta dowlad-goboleedyada.
Waxaa la filayaa in shirka Madasha Aragti-Wadaagga uu ka soo baxo talooyin iyo aragtiyo wax ku biirin doona horumarinta nidaamka federaalka, adkeynta xasilloonida siyaasadeed, iyo xoojinta wadajirka ummadda Soomaaliyeed.
W/Q Abdikadir Jama Mohamed
About The Author
