KISMAAYO, JUBALAND – Dowladda Jubaland waxay bogaadinaysaa geesinnimada iyo guulaha waaweyn ee ay soo hooyeen Ciidamada kala duwan ee Dowladda Jubaland iyo Ciidanka Danab (qaybta Jubaland), ka dib markii ay si weyn u fashiliyeen duullaan ay maleeshiyaadka Khawaarijtu ku soo qaadeen deegaanka Kudhaa ee degmada Badhaadhe.
Faahfaahinta Howlgalka iyo Khasaaraha Cadowga
Muddo ka badan 24 saac, Ciidamada geesiyaasha ah ee Jubaland waxay ku jireen howlgallo naf-hurimo ah oo lagu baacsanayay haraadiga cadowga. Howlgalkan oo lagu soo afjaray firxadkii u dambeeyay ee maleeshiyaadka, ayaa lagu gaarsiiyey jab xooggan oo ka kooban:
- Dhimashada: Waxaa la dilay in ka badan 59 dhagarqabe.
- Dhaawaca: Waxaa cadowga ka dhaawacmay 42 xubnood.
- Gaadiidka: Waxaa laga gubay 10 gaari oo dagaal, kuwaas oo ay saarnaayeen qoryaha culus ee gashaaman.
Tacsi iyo Duco
Dowladda Jubaland waxay Alle uga baryaysaa inuu naxariistii Janno ka waraabiyo halyeeyadii u shahiiday difaaca dalkooda iyo dadkooda intii uu howlgalku socday. Waxaan tacsi tiiraanyo leh u diraynaa qoysaskii, eheladii iyo guud ahaan shacabka reer Jubaland ee ay ka baxeen halyeeyadaas. Sidoo kale, waxaan caafimaad degdeg ah u rajaynaynaa geesiyaasha ku dhaawacmay dagaalka.
Farriinta Ciidanka iyo Shacabka
Casharka adag ee saaka loo dhigay cadowga wuxuu caddeyn u yahay adkaysiga, dulqaadka, iyo go’aanka birta ah ee Ciidanka Jubaland ay u leeyihiin difaaca nabadgelyada iyo xasilloonida deegaanka. Dowladda Jubaland waxay xaqiijinaysaa inaysan marnaba u dulqaadan doonin cid kasta oo isku dayda inay dhibaatayso shacabka.
— DHAMMAAD —
About the Author
