KISMAAYO (Jubaland Tv) – Guddoomiyaha Golaha Wakiillada Dowladda Jubbaland, Mudane Sheekh Cabdi Maxamed Cabdiraxmaan, ayaa shir-guddoomiyey kulan degdeg ah oo ay isugu yimaadeen xubnaha Golaha Wasiirrada Dowladda Jubbaland.
Kulankan oo ahaa mid muhiimad gaar ah leh, ayaa si qoto dheer loogu lafo-guray xaaladda amniga guud ee deegaannada Jubbaland, arrimaha siyaasadda iyo guud ahaan xaaladda bulshada.
Warbixinta Amniga iyo Guushii Kudhaa
Wasaaradda Amniga Gudaha ayaa kulanka ka soo jeedisay warbixin dhammaystiran oo ku saabsan xaaladda nabadgelyada. Wasaaraddu waxay si gaar ah u faahfaahisay guushii ay Ciidamada Dowladda Jubbaland shalay ka gaareen dagaalkii ka dhacay deegaanka Kudhaa.
- Fashilinta Weerarka: Ciidamada ayaa si geesinnimo leh u fashiliyey weerar ay Khawaarijtu ku soo qaadeen deegaanka Kudhaa ee degmada Badhaadhe.
- Burburinta Cadowga: Ciidanka ayaa burburiyey dhowr gaari oo ay kooxdaas adeegsanaysay, iyadoo khasaare xooggan la gaarsiiyey maleeshiyaadkii weerarka soo qaaday.
Go’aannada Kulanka
Guddoomiyaha iyo Golaha Wasiirrada ayaa isku raacay qodobbada soo socda si loo sii xoojiyo xasilloonida deegaanka:
- Xoojinta Amniga: In la kordhiyo feejignaanta ciidamada si looga hortago isku-day kasta oo ay Khawaarijtu ku dhibaataynayaan shacabka.
- Wada-shaqaynta Hay’adaha: In la dardar-geliyo isku-xirka hay’adaha ammaanka iyo maamullada deegaannada.
- Taageerada Ciidanka: In garab istaag joogto ah loo muujiyo ciidamada ku hawlan difaaca nabadgelyada iyo badbaadada shacabka reer Jubbaland.
Ugu dambayn, Guddoomiye Sheekh Cabdi Maxamed Cabdiraxmaan ayaa ku bogaadiyey ciidamada qalabka sida sida ay habeen iyo dhin u taagan yihiin difaaca dalka, isagoo xusay in dowladda iyo shacabkuba ay hiil iyo hoobba la garab taagan yihiin.
W/Q Abdikadir Jama Mohamed
About the Author
