Madaxweynaha Dowladda Jubaland, Mudane Axmed Maxamed Islaam, ayaa sheegay in si buuxda loo hirgelin doono dhammaan qodobada iyo go’aannada kasoo baxay Shirka Aayo-ka-tashiga Golaha Mustaqbalka Soomaaliyeed, kaas oo maanta si guul leh loogu soo gebogebeeyay magaalada Kismaayo.
Madaxweynaha oo ka hadlayay munaasabadda xiritaanka shirka ayaa xusay in heshiisyada lagu gaaray kulanka ay saldhig u noqon doonaan xoojinta wada-tashiga qaran, adkeynta midnimada ummadda Soomaaliyeed, iyo dejinta jihada siyaasadeed ee mustaqbalka dalka.
Sidoo kale, Mudane Axmed Maxamed Islaam ayaa carrabka ku adkeeyay in Dowladda Jubaland ay mar walba diyaar u tahay martigelinta shirarka qaran ee looga arrinsanayo masiirka, midnimada iyo horumarka dalka, isaga oo tilmaamay in wada-hadal iyo is-afgarad ay yihiin furaha lagu wajihi karo caqabadaha siyaasadeed ee jira.
Ugu dambeyn, Madaxweynaha ayaa uga mahadceliyay dhammaan ka-qeybgalayaashii shirka doorkii ay ka qaateen guusha kulanka, isaga oo adkeeyay in natiijooyinka kasoo baxay shirka ay ka tarjumayaan rabitaanka iyo danaha guud ee shacabka Soomaaliyeed.
About the Author
