Garowe, Puntland – Fadhigii maanta ee Guddiga Joogtada ah ee Golaha Wakiillada Dowladda Puntland ayaa ka qabsoomay hoolka shirarka Golaha Wakiillada, waxaana fadhiga guddoomiyey Guddoomiyaha Golaha Wakiillada, isagoo guddiga siiyey warbixin guud oo ku saabsan xaaladda dalka iyo gobolka, gaar ahaan arrimaha ka soo cusboonaaday Puntland iyo doorka ay Dowladdu ka leedahay ilaalinta danaha bulshada.
Ka dib warbixinta guddoomiyaha, guddigu wuxuu yeeshay dood dheer oo ku saabsan xaaladda siyaasadeed ee dalka iyo tan gobolkaba. Waxaa sidoo kale guddigu warbixin ka dhegeystay Madax-gudiyeedyada Golaha, kuwaasoo ka hadlay xaaladda guud ee dalka, amniga, siyaasadda, abaaraha saameeyey deegaanada Puntland, iyo doorka Golaha Wakiillada ee u qareemidda dadka iyo duunyada ay abaartu saamaysay. Intaa waxaa dheer, guddigu wuxuu ka hadlay cabashooyinka Nootaayooyinka Dadweynaha ee ka hawlgala caasimadda Puntland.
Guddiga Joogtada ah ee Golaha Wakiillada, oo matala shacabka Puntland, wuxuu hoosta ka xariiqay in xuduudaha Puntland ee ku cad Qodobka 7-aad ee Dastuurka Dowladda Puntland ay yihiin lama taabtaan, lagumana xadgubi karo, lamana kala qaybin karo, isla markaana aan faragelin gudaha iyo dibedaba lagu samayn karin.
Guddigu wuxuu qirayaa in Dowladda Puntland mar walba u taagnayd dhisidda iyo ilaalinta midnimada iyo wadajirka Ummadda Soomaaliyeed, hase yeeshee wuxuu caddeeyay in Dowladda Federaalka ay gabtay kaalinteedii ku aaddan adkaynta midnimada iyo wadajirka, iyadoo ku mashquushay kala qaybinta, isku dirka, cunaqabataynta iyo cadaadinta dadka Soomaaliyeed.
Sidoo kale, guddigu wuxuu xusay xiriirka ganacsi ee soo jireenka ah ee ka dhexeeya shacabka Puntland iyo Dowladda Isutagga Imaaraadka Carabta, iyo taageerada weyn ee Imaaraadku siiyey Puntland, gaar ahaan dhinacyada amniga, horumarka, iyo la dagaallanka Daacish iyo Al-Shabaab. Guddigu wuxuu si buuxda u taageeray war-saxaafadeedkii Xukuumadda Puntland ee soo baxay 12/01/2026, isagoo uga mahadceliyay Dowladda Imaaraadka Carabta taageerada joogtada ah ee ay siiso shacabka Puntland.
Iyadoo la tixgelinayo cabashooyinka la soo gudbiyey, Guddiga Joogtada ah wuxuu u xilsaaray Guddiga Caddaaladda, Arrimaha Diinta iyo Dastuurka, iyo Guddiga Maaliyadda, Dhaqaalaha iyo Xisaabaadka inay baaritaan iyo talo-bixin ka soo diyaariyaan arrimaha la xiriira cabashooyinka bulshada. Sidoo kale, iyadoo la eegayo xaaladda abaaraha, qaar ka mid ah guddiyada waxaa la xilsaaray inay soo diyaariyaan warbixin dhammaystiran oo ku saabsan xaaladda abaaraha iyo jawaabaha hay’adaha dowladda, gaar ahaan Guddiga Arrimaha Gudaha, Federaalka iyo Dimuqraadiyadda, iyo Guddiga Arrimaha Deegaanka iyo Khayraadka Dabiiciga ah.
Dhanka kale, guddigu wuxuu isla qaatay in la dardar-geliyo qorshayaasha mudnaanta u leh Guddiyada Golaha Wakiillada, lana xoojiyo dabagalka iyo fulinta xeerarkii Goluhu ansixiyey Kalfadhigii 57-aad.
Ugu dambayntii, Guddiga Joogtada ah wuxuu shacabka Puntland ugu baaqay inay ilaashadaan midnimadooda iyo wadajirkooda, isla markaana ay si midaysan uga hortagaan cid kasta oo lid ku ah jiritaankooda. Sidoo kale, hay’adaha amniga waxaa la faray inay adkeeyaan sugidda amniga gudaha iyo ilaalinta xuduudaha Puntland.
About the Author
