KOLBIYOW, Jubbaland – Saraakiisha iyo cutubyo ka tirsan Ciidanka Nabad-sugida iyo Sirdoonka Jubbaland (JISA) ee ku sugan deegaanka Kolbiyow ee gobolka Jubbada Hoose, ayaa maanta hawlgal ballaaran oo biyo-dhaamin ah u sameeyay qoysas barakacayaal ah oo ay saameeyeen abaaraha ba’an ee ka jira deegaanka.
Gurmad ka jawaabaya baahi degdeg ah
Taliyaha Amniga ee deegaanka Kolbiyow, oo hormuud ka ahaa dadaalkan samafal, ayaa sheegay in ciidanku ay go’aansadeen inay qayb ka qaataan samatabbixinta qoysaska danyarta ah ee ku dhibaateysan duleedka magaalada. Dadkan oo ka soo barakacay deegaanno fogfog, ayaa hadda ku sugan goobo loo asteeyay barakacayaasha, balse waxay wajahayeen biyo-la’aan baahsan maaddaama aysan awoodin helidda biyaha magaalada.
“Ciidanku kaliya maahan inay sugaan nabadgelyada, balse waa inay markasta garab taagnaadaan shacabkooda xilliyada adag. Maanta waxaan u soo gurmannay qoysaska danyarta ah si aan uga yareyno haraadka iyo culeyska ay ku keentay abaartu,” ayuu yiri mid ka mid ah saraakiisha hoggaaminaysay gurmadka.
Iskaashiga Ciidanka iyo Bulshada
Dadka barakacayaasha ah ee ka faa’iideystay biyo-dhaamintan ayaa si weyn ugu mahadceliyay saraakiisha ciidanka, iyagoo xusay in gurmadkan uu yimid xilli ay jirtay baahi weyn oo loo qabay biyo nadiif ah.
Xaaladda abaarta ee ka jirta deegaannada hoostaga Kolbiyow ayaa keentay in ceelashii iyo ilahii biyaha ay guraan, taas oo horseedday in qoysas badani ay u soo hayaamaan meelaha ay ciidamada amnigu gacanta ku hayaan si ay u helaan nabadgelyo iyo nolol.
Saraakiisha Amniga Jubbaland ayaa ballan-qaaday inay sii wadi doonaan taageerada ay la garab taagan yihiin bulshada nugul, iyagoo dhanka kale ugu baaqay hay’adaha gargaarka inay soo gaaraan deegaanka Kolbiyow si wax looga qabto baahiyaha kale ee jira sida cuntada iyo caafimaadka.
About the Author
