Afmadow, Jubbada Hoose – Ururka dhalinyarada degmada Afmadow, oo uu wehliyo guddoomiyaha faya-dhowrka nadaafadda Cabdi Cali Xarbi, ayaa maanta qabtay olole nadaafadeed ballaaran oo ka dhacay suuqa weyn ee magaalada iyo goobaha muhiimka ah.
Ololahan nadaafadeed waxaa looga gol lahaa ilaalinta nadaafadda deegaanka iyo kor u qaadidda bilicda magaalada, iyadoo dhalinyaradu bulshada ku wacyigelinayeen inay ka fogaadaan qashinka meelaha dadku ku badan yihiin, maadaama wasakhda ay keento xanuuno faafa oo bulshada saameeya.
Ururka dhalinyarada ee iskood isu xilqaamay ayaa muujiyay doorka togan ee dhallinyaradu ku leeyihiin bulshada, isagoo tusaale u noqday midnimo, iskaa-wax-u-qabso, iyo horumarinta deegaanka. Dhallinyaradu waxay laf-dhabarta bulshada ka yihiin, waxaana ololahan uu cadeyn u yahay sida ay uga go’an tahay horumarinta iyo ilaalinta deegaanka Afmadow.
About The Author
