KISMAAYO (Radio/Web) – Wasiirka Wasaaradda Qorshaynta, Maalgashiga iyo Iskaashiga Caalamiga ee Dowladda Jubaland, Mudane Cabdiraxmaan Cabdi Axmed, ayaa maanta kulan muhiim ah oo diiradda lagu saaray iskaashiga caalamiga ah la qaatay Safiirka Dowladda Sweden u qaabilsan Soomaaliya, Mudane Hans Henric Lundquist.
Kulankan oo ka dhacay jawi is-afgarad ah, waxaa Wasiirka ku wehelinayey xubno ka tirsan kooxda farsamada ee Wasaaradda, oo uu ka mid yahay Agaasimaha Guud, halka Safiirka ay wehelinayeen Madaxa Iskaashiga Horumarka iyo Madaxa Arrimaha Siyaasadda ee Safaaradda Sweden.
Qodobbada Ugu Muhiimsan ee Looga Hadlay
Labada dhinac ayaa si qoto dheer uga wadahadlay arrimo dhowr ah oo saldhig u ah horumarka Jubaland, kuwaas oo ay ka mid yihiin:
- Xaaladda Abaaraha: Sida looga jawaabi lahaa baahiyaha bini’aadanimo ee ka dhashay abaaraha saameeyay deegaannada Jubaland.
- Qorshaha Horumarinta: Taageerada Qorshaha Horumarinta Jubaland (Jubaland Development Plan) si loo gaaro korniinka la hiigsanayo.
- Kaabayaasha Dhaqaalaha: Maalgashiga mashaariicda waaweyn ee kaabayaasha si loo xoojiyo dhaqaalaha gobolka.
- Dhiirrigelinta Maalgashiga: Sidii shirkadaha Sweden iyo kuwa caalamiga ah loogu dhiirrigelin lahaa inay maalgashi ku sameystaan khayraadka dabiiciga ah ee Jubaland.
Mahadnaq iyo Iskaashi
Wasiir Cabdiraxmaan Cabdi Axmed ayaa si weyn ugu mahadceliyay Dowladda Sweden doorkeeda muuqda ee ay ka qaadato dowlad-dhiska Soomaaliya, gaar ahaan taageerada hagar-la’aanta ah ee ay siiso Dowlad Goboleedka Jubaland.
Wasiirka ayaa hoosta ka xariiqay in Jubaland ay diyaar u tahay sii xoojinta xiriirka iyo iskaashiga labada dhinac, si loo gaaro horumar waara oo taabta nolosha bulshada.
W/Q Abdikadir Jama Mohamed
About The Author
