KISMAAYO (Jubaland TV) – Wafdi heer sare ah oo ka kooban diblomaasiyiin ka socda Safaaradaha dalalka Sweden iyo Switzerland, iyo mas’uuliyiin ka tirsan Hay’adda Save the Children, ayaa maanta kormeer iyo qiimeyn ku tagay Isbitaalka Weyn ee magaalada Kismaayo.
Soo dhoweynta Wafdiga
Wafdiga waxaa Isbitaalka ku soo dhoweeyay Kusimaha Agaasimaha Guud ahna Agaasimaha Waaxda Qorsheynta ee Wasaaradda Caafimaadka Jubaland, Mudane Cabdiraxmaan Maxamed Ibraahim, iyo madaxda sare ee Isbitaalka Guud.
Ujeeddada Kormeerka iyo Qiimeynta
Booqashadan ayaa qayb ka ah dadaallada lagu xoojinayo iskaashiga u dhexeeya Wasaaradda Caafimaadka iyo saaxiibbada caalamiga ah. Qodobbada ugu muhiimsan ee wafdigu u kuurgaleen waxaa ka mid ahaa:
- Tayada Adeegga: Qiimeynta heerka adeegyada caafimaad ee isbitaalku siiyo bulshada Kismaayo iyo deegaannada hoos yimaada.
- Baahiyaha Mudnaanta leh: Maamulka Isbitaalka ayaa wafdiga la wadaagay warbixin ku saabsan horumarrada la gaaray, caqabadaha hortaagan adeegga, iyo qalabka caafimaad ee loo baahan yahay in la tayeeyo.
- Indha-indheynta Qaybaha: Wafdiga ayaa mid-mid u booqday qaybaha kala duwan ee isbitaalka, iyagoo arkay sida ay u socoto shaqada maalinlaha ah iyo daryeelka bukaannada.
Xoojinta Iskaashiga
Ujeeddada ugu weyn ee booqashada ayaa ahayd sidii loo kordhin lahaa taageerada ay hay’adaha bahwadaagta la ah Jubaland siiyaan qaybta caafimaadka. Wafdiga ayaa muujiyay sida ay uga go’an tahay inay gacan ka geystaan kor u qaadista tayada isbitaalka, si bulshadu u hesho daryeel caafimaad oo dhammaystiran.
Wasaaradda Caafimaadka Jubaland ayaa dhankeeda uga mahadcelisay safaaradaha Sweden iyo Switzerland iyo hay’adda Save the Children taageerada joogtada ah ee ay la garab taagan yihiin shacabka Soomaaliyeed, gaar ahaan dhinaca badbaadinta nolosha.
W/Q Abdikadir Jama Mohamed
About the Author
