KISMAAYO (Jubbaland) – Agaasimaha Guud ee Wasaaradda Maaliyadda ee Dowladda Jubbaland, Mudane Nuur Cumar Shaale, ayaa maanta magaalada Kismaayo si rasmi ah uga daahfuray aqoon-is-weydaarsi ballaaran oo looga hadlayo xoojinta iyo isku-dubbaridka habraacyada miisaaniyadda dalka.
Ujeeddada iyo Ka-qaybgalka
Kulankan oo ah mid muhiimad weyn u leh nidaamka maaliyadeed ee dalka, waxaa isugu yimid agaasimayaasha iyo khubaro ka socda waaxaha miisaaniyadda ee Dowladda Federaalka Soomaaliya (DFS) iyo Dowlad Goboleedyada xubnaha ka ah (DXDFS).
Aqoon-is-weydaarsigan waxaa soo qabanqaabisay hay’adda FCDO, gaar ahaan mashruuca PFRC, waxaana ujeeddadiisu tahay in la abuuro jawi iskaashi oo dhow iyo xiriir joogto ah oo u dhexeeya heerarka kala duwan ee maaliyadda dalka, si loo mideeyo hannaanka miisaaniyadda qaranka.
Xoojinta Nidaamka Maaliyadda
Agaasime Nuur Cumar Shaale oo hadal ka jeediyay furitaanka ayaa carrabka ku adkeeyay in tallaabadan ay tahay mid horseedi karta horumarinta nidaamka maaliyadeed ee Soomaaliya. Wuxuu xusay in la rabo in la helo hannaan miisaaniyadeed oo isku waafaqsan, kaas oo fududeynaya hufnaanta iyo xisaab-celinta guud ee dalka.
“Waa lagama maarmaan inaan helno habraacyo mideysan oo u dhexeeya Dowladda Federaalka iyo Dowladaha Xubnaha ka ah, si loogu guuleysto qorshayaasha horumarineed ee maaliyadda heer qaran,” ayuu yiri Agaasimuhu.
Ahmiyadda Iskaashiga Heer Qaran
Tallaabadan ayaa loo arkaa guul weyn oo laga gaaray dhisidda kalsoonida iyo wada-shaqeynta dhinaca maaliyadda ee u dhaxeysa maamullada dalka. Waxay sidoo kale gacan ka geysan doontaa in deeq-bixiyeyaasha caalamiga ah iyo hay’adaha maaliyadda ay arkaan hannaan Soomaaliyeed oo mideysan oo dhinaca miisaaniyad-dejinta ah.
About the Author
