Kismaayo: Madaxweynaha Dowladda Jubaland Mudane Axmed Maxamed Islaam. Ayaa maanta si rasmi ah u furay Kalfadhiga 2aad ee Golaha Baarlamaanka Dowladda Jubaland, kaas oo ka qabsoomay xarunta Golaha ee magaalada Kismaayo.
Furitaanka kalfadhigan ayaa waxaa ka qeyb galay Guddoomiyaha Golaha Baarlamaanka Jubaland, Guddoomiye ku-xigeennada, xildhibaano, xubno ka tirsan Golaha Wasiirrada, saraakiil ciidan, marti sharaf iyo masuuliyiin kale oo ka socday hay’adaha kala duwan ee dowladda.
Madaxweynaha Jubaland oo khudbad ka jeediyay munaasabadda ayaa ka hadlay xaaladda guud ee Jubaland, isagoo xusay in dowladdu ay dadaal badan gelisay xoojinta amniga, horumarinta adeegyada bulshada iyo adkeynta hay’adaha dowliga ah. Madaxweynaha ayaa Baarlamaanka ku boorriyay in ay si wadajir ah uga shaqeeyaan sharciyo iyo go’aamo wax ku ool ah oo wax ka tari kara danaha guud ee shacabka Jubaland.
Mudane Axmed Maxamed Islaam ayaa carrabka ku adkeeyay muhiimadda ay leedahay wada-shaqeynta ka dhaxeysa laamaha dowladda, gaar ahaan Baarlamaanka iyo Xukuumadda, si loo xaqiijiyo dowladnimo hufan, isla markaana looga jawaabo baahiyaha jira ee bulshada.
Dhankiisa, Guddoomiyaha Golaha Baarlamaanka Dowladda Jubaland ayaa sheegay in kalfadhigan 2aad uu Golaha horyaallaan ajandayaal muhiim ah, kuwaas oo ay ka mid yihiin ansixinta xeerar cusub, dib-u-eegista sharciyada jira, la-xisaabtanka hay’adaha fulinta iyo ka doodista xaaladaha amniga iyo horumarka Jubaland.
Guddoomiyaha ayaa xildhibaanada ku dhiirrigeliyay in ay gutaan waajibaadkooda dastuuriga ah, kana shaqeeyaan danaha shacabka, iyagoo tixgelinaya mas’uuliyadda culus ee ay u hayaan bulshada ay matalaan.
Kalfadhiga 2aad ee Golaha Baarlamaanka Dowladda Jubaland ayaa la filayaa in uu noqdo mid miro-dhal ah, islamarkaana lagu gaaro go’aamo wax ku biirin doona horumarka, xasilloonida iyo dowladnimada Jubaland.
W/Q Abdikadir Jama Mohamed
About the Author
