BAAR SANGUUNI (Jubalandtv) – Labo ka mid ah maleeshiyaadka kooxda Khawaarijta ah ayaa galabta si rasmi ah isu soo dhiibay Ciidanka Dowladda Jubaland ee ku sugan saldhigga deegaanka Baar Sanguuni ee gobolka Jubbada Hoose.
Aqoonsiga iyo Hubka ay wateen
Raggan oo kasoo goostay kooxda Khawaarijta ka dib markii ay u adkaysan waayeen culeyska ciidanka, ayaa lagu kala magacaabaa:
- Axmed Mustaf Aadan
- Ismaaciil Aadan Ibraahim
Saraakiisha amniga ee deegaanka Baar Sanguuni ayaa xaqiijiyay in ragganni ay wateen hub iyo qalab ciidan oo kala ah:
- Qoriga weyn ee BKM.
- Qoriga AK-47 (Aaran) iyo booshkiisa.
Sida uu u dhacay falka
Wararku waxay intaas ku darayaan in Ciidamada Jubaland ay horay u hayeen xiriirka labadan nin, kuwaas oo ka soo baxsaday agagaarka jiinka wabiga Jubba, halkaas oo ay ku dhuumaalaysanayeen maleeshiyaadka naflacaariga ah ee Khawaarijta.
Burburka Cadowga
Maalmihii la soo dhaafay, waxaa sii kordhayay tirada xubnaha ka tirsan Khawaarijta ee isku soo dhiibaya Ciidamada kala duwan ee Jubaland. Tani waxay muujinaysaa niyad-jabka baahsan ee soo wajahay maleeshiyaadka iyo fashilka ku yimid hoggaankooda, xilli ay ciidamadu sii kordhiyeen howlgalada ka dhanka ah cadowga.
Ragga isku soo dhiibay ciidanka ayaa hadda lagu hayaa xarunta taliska, halkaas oo lagu weydiinayo su’aalo ku saabsan kooxdii ay ka soo goosteen.
W/Q Abdikadir Jama
About The Author
