KISMAAYO — Ciidamada Geesiyaasha ah ee Dawlad Goboleedka Jubaland, oo kaashanaya Ururka 162-aad ee Kumaandooska Danab iyo Ciidanka Nabad-Sugidda Jubaland, ayaa guul weyn ka gaaray hawlgal qorshaysan oo ka dhacay deegaanka Maanbile ee jiinka Wabiga Jubba, duleedka degmada Jamaame.
Dagaalka oo qaatay ku dhowaad afar saacadood, ayaa ku billowday weerar lixaad leh oo lagu beegsaday godad ay Khawaarijtu ka qoteen jiinka wabiga. Ciidamada isku-dhafka ah ayaa muujiyey geesinnimo iyo xeelad dagaal, iyaga oo ku guulaystay inay gudaha u galaan difaacyadii cadowga.
Hawlgalka waxaa qayb muhiim ah ka qaatay duqaymo dhanka cirka ah oo saaciday in si buuxda loo jabiyo kooxdii Khawaarijta ahayd ee halkaas ku dhuumaalaysanaysay. Jabka gaaray cadowga ayaa kor u dhaafaya dhimashada ilaa 70 xubnood, halka ay ka carareen dhaawacyo tiro badan.
Guushan waxay markale marag u tahay iskaashiga dhabta ah iyo midnimada Ciidamada Jubbaland iyo kuwa Dawladda Federaalka ee looga soo horjeedo cadowga umadda Soomaaliyeed.
About the Author
